வறுமை நாடுகளின்
பசிக்கொடுமை நினைவில் வர
பருக்கை மிச்சமில்லாமல்
வழித்து பசியாறினேன்
சாதம் கேட்டால்
போடவா மாட்டேன்
பிச்சைக்காரன் போல்
எச்சமில்லா உண்கிறாயே என
கோபம் கொண்டு
மீண்டும் பரிமாறினாள்
பாசக்காரத் தாய்
விளக்கம் சொன்னால்
விளங்காது இவளுக்கு
பாசக்கண்ணுக்கு பார்வை
கிடையாது என
மீண்டும் உண்டு
பந்தியைவிட்டு வெளியேறினேன்
வீட்டின் வெளியே
அம்மா சோறு என்றான்
பசிகொண்ட பிச்சைக்காரன்
மிச்ச மீதியில்லை
போய் நாளை வா என்றாள்
பாசம்கொண்ட அன்னை
விரக்தியோடு திரும்புபவனை
சிரத்தையோடு கண்கள் பார்க்க
வயிற்றில் இருக்கும் உணவு
சோகத்தில் வயிற்றை முட்ட
கோபமும் பாவமுமாய்
கலவையான உணர்ச்சியோடு
நின்று கொண்டிருக்கிறேன்
வயிறு முட்ட ...
உணவு
வயிறு முட்ட ....!!!
